Plantun de Prouvènço

Pèr coumpara dos planto d'encò nostre

Kickxia elatine subsp. elatine & Picea abies

Velvoto-fèro

Kickxia elatine subsp. elatine

Plantaginaceae Scrophulariaceae

Autre noum : Meisseto.

Noms en français : Velvote, Linaire élatine.

Descripcioun :
La velvoto-fèro es uno planto rebaladisso e di proun pelouso, que trachis dins li champ, armas e li mueio, subretout sus li sablo e l'argielo. Li flour soun pichouneto, jauno e vióuleto e pourtado pèr de long pecou. Se destrìo de sa cousino, l'erbo-de-santo-Verounico, Kickxia spuria, bonodi li fueio (soun de bratèio) que soun astado (dènt à la baso). La subsp. elatine a un pecou que la partido dóu mitan a pas ges de péu. Coumpara emé l'erbo-de-santo-Verounico que ié sèmblo proun.

Usanço :
La planto èi vulneràri, ajudo au caiamen dóu sang di plago.

Port : Grando erbo
Taio : 10 à 80 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Kickxia
Famiho : Plantaginaceae
Famiho classico : Scrophulariaceae

Coulour de la flour : Jauno Vióuleto
Petalo : irreguliero
Ø (o loungour) flour : 0,5 mm
Flourido : Estiéu - Autouno

Sòu : Ca (Si)
Autour basso e auto : Pancaro entresigna
Aparado : Noun
Jun à óutobre

Liò : Champ - Ermas - Mueio - Colo
Estànci : Termoumediterran à Coulinen
Couroulougi : Eurimediterrano
Ref. sc. : Kickxia elatine subsp. elatine (L.) Dumort., 1827

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.